Party Leader’s Garifuna Day Message – Garifuna

GARIFUNA SETTLEMENT DAY MESSAGE
by: Hon. John Briceño
Leader for the Opposition
and Leader of the People’s United Party
at Official Ceremonies Dangriga
19th November 2016

Rísiti, Pántati, Gabafuti, Iúnrahówa meme la
Lidan irumu 1492, aban weyu lubá larugan aba lábürügü Columbusu habu lisudaran tuma büri lugune lidan le unbei hagúara aturiahatian aban iseri ubóu. Ladüga susereti ligía aba hadunragu amuñeguéinarügü gürigia luma büri susereti lun lasansiruni ubóu gumugua dan. Lidan gíenti hadúnragun amuñeguéinarügü rasa ladüga meme susereti le aba ti mosu la habayarahan aban luweirin ihürügu aba lubeiti sian la wafareiraguni wasügürü wawariuwagúa dagá lumoun fecha le.
Woun wagía ya Balisi, hábürügüle furumien Garinagu ya lidan irumu 1802 lau bucharuaü lárigi fayáü lárigi habugawagún hageiragien, ligía aban lídangien susereti le gárigitimábei. Mémegi, maredeti hayumahan lun hawiwandu kei wügürian hama würían líburetian luma pantaü kei Garinagu. Darandi irumu lárigi aba hábürügü ya saragu hawoun aban weyu lidan Unsu Hati, lebubei awanha lubéi afeduhei hafedun Garinagu guentó.
Saragu irumu lárigi weyu ligía lidan Unsu Hati 1832, watian bugan Garinagu Balisina luagu hagurasun hayunagu lun hagunfuliruni hawenedi hayunagu lun haweiridaguágüdüni Balisi mámarügü hóuniwagua, woun sungualuágu. Kei hayunagu mabuluchagúntian lebubei gawara la larihíniwa hárigi Garinagu lidan sun lácharagun ibagari Balisi.

Arihúati hárigi Garinagu Balisina haganagua arufudahatian dagá hamoun inginéru, dagá hamoun surusia, akutihatian, fádirigu hama lídantian politiku.
Uguñe weyu lanichugu Balisi anichugu Garifuna an hiúngua lumuti baraüwa Garifuna láfadaragun saragu ageiraü, abahüdüwa ligía geyegu ubóu asta lun laríengúniwa lau lunti la lareidahóun gumugua dan.
Mosu weiri la hapanta wügürian hama würían ha meha ábürügübaña 1802 hama híbiri ha ñünbibaña 1832 lau barühamá la, afeduha haméi sun Balisina, lanichugu Garifuna, lugundu ti bürügien amu la lira luei luwiyeri binadu saminaü le yebe busienbei lagumuchu hau gürigia ha aransebaña lun hónwengu ageindagua lun hawinwandun kei habéi luma lun mamudirún hamá.
Ladüna lubéi ti lun wafeduhani Hafedun Garinagu irumu le agumeirei lupanta, lubafu luma lirisin Garifuna. “Garifunaduáü.” Afeduha wamuti pantaü ligía luagu lawandadi. Kei laríenguni Jeremy Enriquez, “aban adügaü le mama furumienguárügüti le gadünati lafeduhóun” le rügü magumuchaguágüdü lani lugumadi Ingüleisi anichugu le.
Wafeduha lubéi ti uguñe, ruwama seremei hawagu hiúnagu derebugutian ha achülüragüdübádiü águyu lidoun lirufugun wageira Balisi. Inchahaláü hagurasun magumuchagu lámuga alagan le hígirubei. Bunagua humá kei hábunagu hiúnagu lun harufudahani hanichugu houn hirahüñü, deregegua wagía me gíen woungua lun wiúnrahani wageira lau pantaü, aban Balisi le nadagimeiti houn sun.
Gunda la Hásügürüni Hafedun Garinagu!!!